RSS

អង្ករខ្មែរលក់នៅផ្សារបារាំង

23 Dec

មិនមែនជារឿងប្លែកទេសំរាប់ជនជាតិផ្សេងៗជាពិសេសជនជាតិនៃប្រទេសជិតខាងយើងដូចជា វៀតណាម ថៃ ជាដើម នៅពេលដែលគេឃើញផលិតផលរបស់ប្រទេសគេត្រូវបានដាក់លក់នៅឯក្រៅប្រទេស។ តែសំរាប់ខ្ញុំ គ្រាន់តែឃើញផលិតផលរបស់ប្រទេសខ្លួនដាក់លក់នៅក្នុងផ្សារមួយរបស់ប្រទេសបារាំង ខ្ញុំក៏មានអារម្មណ៏សប្បាយចិត្តអំពីអ្វីម្យ៉ាង។

ដូចដែលអ្នកទាំងអស់គ្នាដឹងស្រាប់ហើយ ថាមាតុប្រទេសយើងគឹជាប្រទេសមួយដែលមានសមត្ថភាពផលិតអង្ករល្អ មានខ្លិនប្រហើរ ទន់ឆ្ងាញ់ ល្បីដល់ឯនាយសមុទ្រ។ តែអ្វីដែលប្លែកនោះ រយៈពេលជាងពីរឆ្នាំដែលខ្ញុំរស់នៅស្រុកគេនេះ ខ្ញុំមិនដែលឃើញមានផលិតផលខ្មែរណាមួយដាក់លក់ទេ ទាំងនៅផ្សារចិន(ផ្សារដែលលក់ផលិតផលអាស៊ី) ទាំងនៅផ្សារបារាំង។ នេះក៏ប្រហែលជានៅស្រុកដែលខ្ញុំកំពុងតែរស់នៅនេះ ជាស្រុកតូចមួយ ហើយមិនមានផលិតផលអាស៊ីសំបូរបែបដូចនៅឯប៉ារីស ​ឫក៏នៅឯក្រុងធំៗមួយចំនួនទៀតក៏ថាបាន។ តែផ្ទុយទៅវិញ ខ្ញុំឃើញមានផលិតផលផ្សេង  ទាំងធម្មជាតិត ទាំងកែឆ្នៃជាច្រើន ដែលនាំចូលពីប្រទេសថៃ វៀតណាម ជាដើម។ សូម្បីតែប្រហុកខ្មែរ ក៏ផលិតនៅប្រទេសវៀតណាមដែរ ដោយគ្រាន់តែដាក់ថាប្រហុកខ្មែរ​ តែផលិតនៅវៀតណាម។ កាលពីខ្ញុំទៅប៉ារីសប៉ុន្មានខែមុន ខ្ញុំឃើញផ្ទះមិត្តភក្តរបស់ខ្ញុំគេមានអង្ករមួយការ៉ុង ដែលដាក់ឈ្មោះថាអង្ករនាំចូលមកពីស្រុកខ្មែរយើង។ តែគួរអោយស្តាយ អង្ករនោះមិនឆ្ងាញ់ទេ ហើយមិត្តខ្ញុំ ក៏ស្តាយដែរ ដែលទិញអង្ករនោះ។

ល្ងាចមិញនេះ ខ្ញុំបានទៅផ្សារបារាំងមួយឈ្មោះ Champion។ ផ្សារនេះគេយកផលិតផលមួយចំនួនធំពីផ្សារធំមួយទៀតមកលក់គឺឈ្មោះ Carrefour។ ពេលដែលទិញរបស់ផ្សេងៗរួចហើយ ខ្ញុំក៏ដើរទៅរកទិញអង្ករថៃមួយកញ្ចប់ ព្រោះចង់ធ្វើបបរគ្រឿង។ ទៅដល់កន្លែងដាក់អង្ករ ខ្ញុំកំពុងតែពិនិត្យរកអង្ករថៃ ខ្ញុំក៏ប្រទះភ្នែកនឹងរូបអង្គរវត្ត ភ្លាមនោះ ខ្ញុំក៏ចាប់អារម្មណ៏អានអក្សរនៅលើសំបកកញ្ចប់ភ្លាម គឺអង្ករខ្មែរពិតៗ ខ្ញុំមិនច្រលំទេ។ ខ្ញុំក៏បែរជាសប្បាយចិត្ត ឈរញញឹមម្នាក់ឯងមួយសន្ទុះ រួចក៏យកអង្ករពីរកញ្ចប់មកដាក់ក្នុងរទេះអូសភ្លាម។

អង្ករមួយកញ្ចប់ទំងន់ ៥០០ ក្រាមតំលៃ ១អឺរ៉ូ៣០សេន។ គិតទៅគឺប្រហែលជា ១ដុល្លា៦០សេន។ បើប្រៀបធៀបនឹងតំលៃអង្ករប្រភេទល្អមួយរបស់នាំចូលពីប្រទេសថៃដែលខ្ញុំធ្លាប់ទិញនៅផ្សារចិន គឺថោកជាងរបស់គេបន្តិច។ បើខ្ញុំចែកទៅ អង្ករគេតំលៃ ១អឺរ៉ូ៥០សេន។ នេះក៏ប្រហែលជាមកពីផ្សារចិនតំបន់ខ្ញុំលក់របស់ថ្លៃក៏ថាបានដែរ។

សំបកកញ្ចប់មានការចនាបានយ៉ាងស្អាត ខ្ញុំចូលចិត្តទាំងពណ៌ទាំងរូបភាពដែលគេរចនា។ នៅពីមុខខាងលើ មានសរសេរអក្សរថា អង្ករខ្មែរ ដោយបញ្ជាក់បន្ថែមថា មានក្លិនក្រអូបបែបធម្មជាតិ។ នៅចំហៀងកញ្ចប់គេមានដាក់ផែនទីតំបន់មួយដោយគូរង្វង់បញ្ចាក់ទីតាំងប្រទេសខ្មែរ ដោយមានសរសេរអត្ថបទខ្លីមួយនៅខាងក្រោមផែនទីថា Carrefour (ឈ្មោះរបស់ផ្សារ) បានជ្រើសរើសអង្ករដែលមានគុណភាពល្អលើសគេ ផលិតនៅខេត្តបាត់តំបង ដែលស្ថិតនៅភាគខាងត្បូងឈៀងខាងលិចនៃប្រទេសកម្ពុជា។ អង្ករមានខ្លិនក្រអូបបរិសុទ្ធបែបធម្មជាតិ ដែលធ្វើអោយអាហាររបស់អ្នកាត់តែអស្ចារ្យថែមទៀត។

ខ្ញុំបានសាកល្បងរូចហើយ អង្ករនេះឆ្ងាញ់ ប្រហើរ សាកសមនឹងភាពល្បីល្បាយរបស់អង្ករខ្មែរ។ តែខ្ញុំថានៅស្រុកខ្មែរ នៅមានអង្ករដែលល្អជាងនេះ សំរាប់នាំចេញ។ ហើយខ្ញុំសង្ឃឹមថា អង្ករខ្មែរនឹងអាចនាំចេញបានច្រើនជាងនេះ ដើម្បីបង្កើនការងារក្នុងស្រុក។

 
 

12 responses to “អង្ករខ្មែរលក់នៅផ្សារបារាំង

  1. វឌ្ឍនា

    ខែធ្នូ 23, 2010 at 11:49 ល្ងាច

    ណា…ទីបំផុតមានមុខនៅផ្សារអន្តរជាតិហើយ!

     
  2. achharia

    ខែធ្នូ 24, 2010 at 12:38 ព្រឹក

    ចុះពួកការ៉ុងធំៗ ២៥ និង ៣0គីឡូមានឃើញលក់ហើយនៅ ។
    ខ្ញុំមានមោទនភាពជាមួយណាស់ ទោះថៅកែបរទេសក៏ដោយ
    អោយតែបានផលិតផលខ្មែរមានមុខនៅទីផ្សារក្រៅប្រទេស
    រហូតដល់អឺរ៉ុបបាន ។

     
  3. Long

    ខែធ្នូ 24, 2010 at 2:24 ព្រឹក

    មោទនភាពមែនដែលកើតជាកូនខ្មែរ ប្អូនក៍សប្បាយដែរ!

     
  4. lavorn (ឡាវ័ន​)

    ខែធ្នូ 24, 2010 at 6:46 ព្រឹក

    អាន​ដំ​បូង​មាន​អារម្មណ៍​ថា​អន់​ចិត្ត​និង​ឈឺ​ចិត្ត​ឆ្អិត​ទ្រូង​ពន់​ប្រ​មាណ​ត្បិត​យើង​ថា​មិត្ត​នោះ​ស្តាយ​ក្រោយ​ដែល​ទិញ​អង្ករ​ខ្មែរ​ដែល​អត់​ឆ្ងាញ់​ ហើយ​អាន​ដល់​ចុង​ក្រោយ​បុក​ពោះ​ភ័យ​តិច​អី​តិច​ ខ្លាច​យើង​ថា​ញ៉ាំ​​អង្ករ​ដែល​ទិញ​នោះ​ហើយ​មាន​អារម្មណ៍​ថា​អត់​ឆ្ងាញ់​។ តែ​​ហេង​វិន​ដែល​យើង​ថា​ឆ្ងាញ់​! ធូរ​ទ្រូង​ខ្ញាក​!! ….

     
  5. lavorn (ឡាវ័ន​)

    ខែធ្នូ 24, 2010 at 6:52 ព្រឹក

    តែ​ចំ​ពោះ​នៅ​កូរ៉េ​វិញ​ អ្នក​គ្រូ​ខ្ញុំ​ដែល​ធ្លាប់​ទៅ​លេង​ស្រុក​ខ្មែរ​ប្រាប់​ថា​អង្ករ​ខ្មែរ​ឬ​អង្ករ​នៅ​ប៉ែក​ខាង​យើង​នោះ​ ទន់​ៗ​ហើយ​វែង​ៗ​ល្អ​មើល​ណាស់​។​ អង្ករ​នៅ​កូរ៉េ​មូល​ៗ​ហើយ​រឹង​ៗ​។​ ពេល​ខ្លះ​ខ្ញុំ​ញ៉ាំ​ហើយ​មាន​អារម្មណ៍​ថា​ បាយ​នោះ​ដាំ​ស្ទើរ​ភ្ហើង​ ដូច​ឆៅ​តិច​ៗ​ ឬ​ខ្ញុំ​គិត​ថា​អង្ករ​នោះ​បែប​អង្ករ​ថោក​ឬ​អន់​ហើយ​។ តែ​តាម​ពិត​មិន​មែន​ទេ​ គឺ​អង្ករ​អ្នក​ស្រុក​នេះ​រឹង​ៗ​ចឹង​ម៉ង​ ហើយ​មិន​ចូល​ចិត្ត​អង្ករ​ទន់​ល្មើយ​ទេ​។ ដូច​នេះ​អង្ករ​ឆ្ងាញ់​ឬ​មិន​ឆ្ងាញ់​វា​អា​ស្រ័យ​លើ​ចំ​នង់​ចំ​នូល​ចិត្ត​មនុស្ស​ទេ​។

     
    • lavorn (ឡាវ័ន​)

      ខែធ្នូ 24, 2010 at 6:54 ព្រឹក

      អង្ករ​ទន់​ល្មើយ​ចង់​សំ​ដៅ​ថា​ អង្ករ​ដាំ​ហើយ​ ក្លាយ​ជា​បាយ​ដែល​ទន់​ល្មើយ​… 😀

       
  6. s3iLa

    ខែធ្នូ 27, 2010 at 9:35 ព្រឹក

    ឡូយបោះគេហា!

     
    • សុភា

      ខែធ្នូ 31, 2010 at 4:23 ល្ងាច

      មិនទាន់ឡូយទេ ព្រោះតិចណឹង។ អង្ករថៃ យួន គេលក់ច្រើនណាស់ណា

       
  7. មេឃា

    ខែធ្នូ 29, 2010 at 2:20 ព្រឹក

    អង្ករផ្កាម្លិះ មែនទេ !?
    នៅស្រុកបាត់ដំបង ពលរដ្ឋច្រើនលើកទឹកចិត្តថា អ្នកដែលមានអង្កផ្កាម្លិះហូប សុទ្ធតែជាអ្នកមាន… ចៃដន្យអី ខ្ញុំទិញហូបម៉ារដូវៗដែរ… នេះមិនមែនអួតថា ខ្លួនខ្ញុំជាអ្នកមានទេ…

    ប្អូនខ្ញុំទៅស្រុកបារាំងម្តងៗ ខំវេចតែអង្ករដំណើបទៅ ព្រោះគាត់ចូលចិត្ត… ចុះសុភា វេចអីទៅវិញ ?

     
  8. moeurnvanna

    ខែធ្នូ 30, 2010 at 5:11 ព្រឹក

    តែសំណាងល្អ ដែលខ្ញុំជាអ្នកស្រុកបាត់ដំបង ដូចនេះស្រូវប្រភេទអាអ្វីក៏ធ្លាប់បានភ្លក់រសជាតិដែរអត់តែស្រូវសាលី របស់បរទេសប៉ុននោះ។ តាមខ្ញុំដឹងមានរឿងជាច្រើនទាក់ទងនិងរឿងអង្ករខ្មែរទៅលក់នៅឯ បរទេសគឺអាចថាជាប់ ចំណាត់ថ្នាក់លើគេផង ។​ ប៉ុន្តែ ស្រូវខេត្តបាត់ដំបងស្ទើរតែ៩០% បាននាំចេញទៅ ប្រទេសថៃនិង ប្រទេសយួន។ ហើយក្នុងនោះ៤៥% បាននាំចេញដោយគ្មានបញ្ជីការត្រឹមត្រូវ នេះហើយជាមូលហេតុចំបងដែលយើងមិនសូវដឹង។ ដោយគេយកស្រូវរបស់ស្រុកយើង ហើយប្តូរទៅជាស្រូវរបស់គេវិញ តែដាក់ស្រូវឈ្មោះខេត្តបាត់ដំបង ហើយនាំចេញ ទៅលក់ឯបរទេស នេះពិតជាមិនសមដែលស្រូវស្រុខ្មែរបែរជាគេអ្នកនាំចេញ ហើយបានលទ្ធផលគេជាអ្នកនំាចេញបានច្រើនជាង ខ្មែរទៅវិញ។

     
    • សុភា

      ខែធ្នូ 31, 2010 at 4:28 ល្ងាច

      អង្ករនេះ គេនាំចេញដោយដាក់ឈ្មោះថារបស់ប្រទេសខ្មែរ។ រឿងក្រុមហុននាំចេញនោះ វាមិនជាបញ្ហាចោទទេ អោយតែគេទិញអង្ករនោះក្នុងតំលៃត្រឹមត្រូវ ហើយរដ្ឋាភិបាលគ្រប់គ្រងត្រឹមត្រូវ។ បើទោះជាក្រុហុនខ្មែរក៏ដោយ បើកេងប្រវ័ញប្រជាជន ក៏គង់តែផល់នោះ មិនបានលើប្រជាជនខ្មែរដែរ

       

ឆ្លើយ​តប

Fill in your details below or click an icon to log in:

ឡូហ្កូ WordPress.com

អ្នក​កំពុង​បញ្ចេញ​មតិ​ដោយ​ប្រើ​គណនី WordPress.com របស់​អ្នក​។ Log Out / ផ្លាស់ប្តូរ )

រូប Twitter

អ្នក​កំពុង​បញ្ចេញ​មតិ​ដោយ​ប្រើ​គណនី Twitter របស់​អ្នក​។ Log Out / ផ្លាស់ប្តូរ )

រូបថត Facebook

អ្នក​កំពុង​បញ្ចេញ​មតិ​ដោយ​ប្រើ​គណនី Facebook របស់​អ្នក​។ Log Out / ផ្លាស់ប្តូរ )

Google+ photo

អ្នក​កំពុង​បញ្ចេញ​មតិ​ដោយ​ប្រើ​គណនី Google+ របស់​អ្នក​។ Log Out / ផ្លាស់ប្តូរ )

កំពុង​ភ្ជាប់​ទៅ​កាន់ %s

 
%d bloggers like this: